Një operacion ndërkombëtar, i mbështetur nga Europol, ka çuar në arrestimin e një trafikanti të dyshuar heroine, i cili dyshohet se drejtonte një rrjet të gjerë kriminal që shtrihej nga Irani deri në Evropën Perëndimore. Bëhet fjalë për Nihat Ozbek, një 57-vjeçar me origjinë nga Turqia, i cili akuzohet si kreu i një rrjeti kriminal të përfshirë në importimin masiv të heroinës nga Irani drejt Europës.

Sipas autoriteteve, Ozbek është i lidhur me një ngarkesë prej 703 kilogramësh heroinë, e cila u sekuestrua më 30 gusht 2022 në portin e Hamburgut, Gjermani. Heroina ishte fshehur në një ngarkesë sapuni me origjinë nga Irani. Arrestimi i tij është kryer më 23 nëntor 2024 në aeroportin e Rinasit, sapo ai kishte mbërritur nga Turqia në Shqipëri. Për shkak të ndjeshmërisë së hetimit, lajmi u mbajt i fshehtë deri në finalizimin e fazave të tjera të operacionit nga Europol.

Ndërkohë, janë kontrolluar prona dhe biznese të lidhura me të dyshuarin dhe të dashurën e tij në Roterdam të Holandës, në përpjekje për të zbardhur më shumë detaje mbi aktivitetin kriminal të rrjetit që ai drejtonte.

Detajet nga hetimi

Hetimi i nisur në prill të vitit 2022 ka arritur të lidhë Ozbekun me ngarkesën e madhe të heroinës të sekuestruar në Hamburg. Droga ishte fshehur në kontejnerë sapuni dhe kishte origjinë nga Irani. Heroina konsiderohet një nga drogat më vdekjeprurëse, pasi një dozë e vogël mund të jetë fatale për konsumatorët. Aktualisht, Ozbek është në pritje të ekstradimit në Gjermani, ku do të përballet me akuzat.

Në këtë hetim kanë marrë pjesë Zyra Federale e Policisë Kriminale Gjermane, Policia Kufitare Shqiptare dhe Europol, duke krijuar një Task-Forcë Operacionale në gusht 2023. Kjo Task-Forcë ka për qëllim identifikimin dhe shkatërrimin e rrjeteve kriminale përgjegjëse për furnizimin masiv të heroinës drejt vendeve të BE-së.

Ndërsa kokaina shpesh dominon titujt kryesorë të lajmeve, heroinës i kushtohet një vëmendje e veçantë për shkak të përfitimeve të larta që ofron për grupet kriminale. Europol ka bërë të ditur se rrjeti i drejtuar nga Ozbek ishte një nga më të organizuarit dhe përgjegjës për ngarkesa të shumta heroine që janë futur në Europë gjatë viteve të fundit.

Autoritetet e përfshira në operacion

Në hetimin e koordinuar ndërkombëtar kanë marrë pjesë:
•Gjermania: Zyra Federale e Policisë Kriminale (Bundeskriminalamt) dhe Zyra e Prokurorit në Dresden.
•Holanda: Policia Kombëtare e Hetimeve dhe Operacioneve Speciale, si dhe Zyra e Prokurorisë Publike Kombëtare.
•Shqipëria: Policia Kufitare.
•Europol: Qendra Evropiane e Krimit të Organizuar të Rëndë.

Arrestimi i Ozbekut përbën një goditje të rëndësishme për rrjetet kriminale të trafikut të heroinës dhe është një hap drejt shkatërrimit të strukturave kriminale që operojnë në këtë fushë.