Autoritetet italiane kanë arrestuar një 30-vjeçar shqiptar, i akuzuar për shitje të kokainës. Operacioni u zhvillua pranë varrezave të Cabriolos, në një zonë ku ndodhej edhe një parking makinash.

Gjatë aksionit, policia vëzhgoi tre persona që po shkëmbenin diçka pranë dy makinave me motorët e ndezur. Gjatë kontrollit, shqiptarit iu gjetën sasi droge dhe 350 euro para të gatshme. Situata u bë edhe më e dyshimtë kur ai u përpoq të mbulonte një pjesë të makinës, ku kishte fshehur një mekanizëm të ndërtuar posaçërisht për fshehjen e lëndëve narkotike.

Policia zbuloi një dhomëz sekrete në automjet, ku ishte vendosur një krem fytyre që brenda përmbante 10 doza kokaine me peshë 6 gramë. Pas arrestimit, Gjykata e Parmës vendosi masën e ndalimit për shqiptarin, ndërsa pritet dëbimi i tij nga Italia.

Ndërkohë, dy personat e tjerë u morën nën hetim, ndërsa autoritetet po vazhdojnë hetimet për të zbuluar rrjetin e mundshëm të shpërndarjes së drogës.