Një 49-vjeçar shqiptar është arrestuar nga policia italiane pas një incidenti të rëndë që ndodhi mesnatën e djeshme në një lokal nate në Castel Bolognese. Sipas autoriteteve, ai akuzohet se ka qëlluar një person me armë pas një debati.

Ngjarja ka ndodhur në hyrje të lokalit, ku i plagosuri ishte duke qëndruar kur 49-vjeçari mbërriti dhe u përfshi në një përplasje me të. Pas debatit, shqiptari nxori armën dhe e qëlloi katër herë, duke shkaktuar lëndime të rënda. Megjithatë, ai arriti të largohej nga vendi i ngjarjes.

Pas një ndjekjeje të shpejtë, policia arriti ta arrestojë shqiptarin dhe konfiskoi pistoletën gjysmëautomatike që ai përdori, e cila rezultoi se ishte e vjedhur. 49-vjeçari akuzohet për veprat penale të “vrasjes së mbetur në tentativë” dhe “armëmbajtjes pa leje”. Ai është dërguar në burgun e Ravenës dhe pritet të përballet me masën e sigurisë.