Policia e Tiranës ka arrestuar një nga personat e përfshirë në mbajtjen e mbyllur të një vajze 21-vjeçare, ngjarje e ndodhur më 9 janar të këtij viti, në një apartament në zonën e Astirit.

I arrestuari është Ermal Binjaku, 36 vjeç, banues në Tiranë, një person me precedentë penalë. Sipas policisë, Binjaku, në bashkëpunim me disa persona të tjerë të shpallur në kërkim, mbajti të mbyllur 21-vjeçaren Sajma Qordja në një apartament. Vajza kishte njoftuar familjarët e saj për ngjarjen, duke thënë se po mbahej kundër vullnetit të saj dhe ishte dhunuar. Për të shpëtuar të miturën, policia ndërhyri duke hyrë në apartament nga ballkani, duke u zbritur me litarë pasi ajo refuzonte të hapte derën.

Pas ndërhyrjes, u zbulua se apartamenti ishte marrë me qira ditore nga Joni Sadikaj, i dyshuari kryesor dhe i dashuri i vajzës. Në këtë apartament, së bashku me disa të rinj, ata kishin festuar natën duke konsumuar alkool dhe kokainë. Gjatë kontrollit në një tjetër apartament të marrë me qira nga të rinjtë, u gjetën armë zjarri dhe lëndë narkotike.

Ermal Binjaku ka një histori të mëparshme me policinë, pasi ka qenë i dënuar për sigurim kushtesh në një vrasje në Fier në vitin 2016 dhe është arrestuar në korrik 2023 për bashkëpunim me persona në kërkim.

Policia po vijon kërkimet për arrestimin e Joni Sadikajt dhe katër të tjerëve: Skerdi Sina, Arnold Jaho, Ogert dhe Anduen Alia.