Një shqiptar 33-vjeçar është arrestuar nga autoritetet italiane si i dyshuari kryesor për atentatin mafioz të ndodhur më 1 mars 2024 në Montichiari, Brescia, ku mbeti i vrarë një sipërmarrës italian. Sipas mediave dhe Prokurorisë italiane, ai është identifikuar si autori i ekzekutimit dhe kreu i grupit kriminal.

Hetimet zbuluan se shqiptari kishte krijuar një rrjet kriminal në bashkëpunim me një sipërmarrës italian dhe disa shtetas marokenë, të cilët merreshin me trafik kokaine në zonën e Brescias. Operacioni i policisë çoi në arrestimin e gjithsej tetë personave.

Gjithashtu, u zbuluan dy struktura të tjera kriminale të përfshira në mashtrime tatimore dhe përdorim të faturave fiktive me vlerë mbi 450 mijë euro. Operacioni u zhvillua në shtatë provinca italiane (Brescia, Milano, Bergamo, Verona, Mantova, Ferrara dhe Rovigo) dhe përfshiu njësi speciale, qen “cash dog” dhe njësi NAS për kontrolle mbi substanca të ndaluara.