Një shtetas sirian, i dyshuar për qëndrime radikale islamike, është arrestuar në Bavari me akuzën se planifikonte të vriste ushtarë gjermanë me hanxharë në qytezën Hof, njoftuan prokurorët të premten. I dyshuari, 27 vjeç, kishte siguruar dy hanxharë me gjatësi prej rreth 40 centimetra, të cilët synonte t’i përdorte për sulme ndaj ushtarëve të Forcave të Armatosura të Gjermanisë.

Sipas autoriteteve, ai planifikonte t’i sulmonte ushtarët gjatë pushimit të drekës dhe të vriste sa më shumë prej tyre. Qëllimi i tij ishte të tërhiqte vëmendje dhe të krijonte ndjesi pasigurie në publik.

Kjo ngjarje vjen në një kohë kur Gjermania ka intensifikuar masat e sigurisë dhe kontrollet kufitare, pas një serie sulmesh me thikë të kryera nga azilkërkues të dyshuar. Në gusht, Shteti Islamik mori përgjegjësinë për një sulm me thikë në qytetin Solingen, ku tre persona humbën jetën.