Ditën e sotme, policia në Shkodër ka vënë në pranga personin e katërt të shpallur në kërkim në lidhje me djegien e katër automjeteve dhe kryerjen e gjashtë vjedhjeve në banesa në zonën e Vaun e Dejës.
Shtetasi i arrestuar është identifikuar si Klodian Dibra, 24 vjeç. Ai bashkë me tre shtetas të tjerë, të ndaluar më herët gjatë javës, akuzohen për veprat kriminale të kryera në periudhën shtator-nëntor 2023. Grupi dyshohet se ka shkaktuar djegie në katër automjete dhe ka kryer vjedhje në 6 banesa, duke arritur të kapë vlera të konsiderueshme parash dhe sendesh.
Megjithë arrestimin e Klodian Dibrës, shtetasi A.N. mbetet ende në kërkim nga autoritetet. Hetimet vazhdojnë për të zbardhur plotësisht ngjarjen dhe identifikuar të gjithë përfshirësit.
Njoftimi i policisë:
Vijon operacioni policor i koduar “Polinomi”, i zhvilluar ditën e djeshme, për zbardhjen e 8 ngjarjeve kriminale në fushat e vjedhjes dhe shkatërrimit të pronës, të kryera gjatë vitit të fundit, nga 5 shtetas që vepronin si grup.
Bashkautor për djegien e 4 automjeteve dhe për kryerjen e 6 vjedhjeve në banesa në Vaun e Dejës dhe në Shkodër, lokalizohet dhe vihet në pranga 24-vjeçari i shpallur në kërkim.
3 shtetas të tjerë të implikuar në këto ngjarje kriminale, u vunë në pranga dje, gjatë operacionit “Polinomi”.
Si rezultat i kontrolleve dhe veprimeve të tjera operacionale të shërbimeve të Komisariatit të Policisë Vau i Dejës, të kryera në vijim të operacionit policor të koduar “Polinomi”, u kap në bashkëpunim me shërbimet e Komisariatit të Policisë Shkodër, shtetasi i shpallur në kërkim K. D., 24 vjeç, banues në Shkodër.
Nga hetimet dyshohet se 24-vjeçari dhe shtetasit R. G., G. D., F. J. (të arrestuar dje) dhe A. N. (ende në kërkim), të organizuar si grup, më datat 18.11.2022 dhe 10.01.2023, kanë djegur 4 automjete, ndërsa gjatë periudhës shtator-nëntor 2023, kanë vjedhur shuma parash dhe sende personale, në 6 banesa, në Vaun e Dejës dhe në Shkodër.
Vijon puna për kapjen e shtetasit A. N., dhe në bashkëpunim me Prokurorinë e Shkodrës, po kryhen hetime për të zbardhur dhe provuar ligjërisht ngjarje të tjera kriminale kundër pronës dhe pasurisë, që mund të kenë kryer këta shtetas.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.