Aleksandar Karadakoski, pronari i kompanisë “MMMM Cafe Doel Koçani”, e cila menaxhonte diskotekën “Pulse”, është arrestuar pas tragjedisë së rëndë që ndodhi në orët e para të mëngjesit të 16 marsit në Koçan, ku humbën jetën të paktën 59 persona dhe qindra të tjerë mbetën të lënduar. Lajmi u raportua nga Televizioni Telma.

Sipas informacioneve, kompania e tij kishte një llogari bankare të bllokuar dhe rezultonte me humbje financiare prej rreth 3,000 euro në vitin 2023. Gjithashtu, objekti i diskotekës nuk kishte kushte sigurie të përshtatshme për një numër kaq të madh njerëzish, të cilët sipas raportimeve shkonin nga 1,500 deri në 1,700 persona.

Shkaqet e zjarrit dhe viktimat e tragjedisë

Hetimet paraprake tregojnë se zjarri u shkaktua nga përdorimi i xixëllonjave dhe efekteve vizuale skenike, të cilat ndezën çatinë e lokalit, e ndërtuar me material të ndezshëm. Mes të plagosurve është edhe këngëtari Vlladimir Blazev-Panço, i cili po performonte me grupin ADN. Ai ka pësuar djegie në fytyrë dhe në dorë dhe ndodhet në mbështetje me oksigjen.

Tragjedia ka prekur edhe botën e muzikës dhe sportit. Pesë anëtarë të grupit DNK humbën jetën: Filip Stefanovski, Gjorgi Gjorgiev, Sara Projkovska, Andrej Gjorgievski dhe fotografi i grupit, Aleksandar Efremov. Gjithashtu, viktimë e zjarrit ishte edhe futbollisti i Klubit Shkupi, Andrej Llazarov.

Hetimet dhe shkeljet ligjore

Sipas të dhënave publike të Kadastrës, objekti kishte një hapësirë totale prej 360 metrash katrorë në një parcelë prej 970 metrash katrorë dhe kishte vetëm dy hyrje-dalje: një kryesore dhe një tjetër për stafin dhe VIP-at. Klubi, sipas informacioneve, operonte me një licencë të falsifikuar, e cila mbante firmën e ish-sekretares shtetërore në Ministrinë e Ekonomisë, Razmena Çekiç Duroviq.

Policia dhe autoritetet janë duke vazhduar hetimet për të zbardhur plotësisht shkaqet e kësaj tragjedie dhe për të vënë përpara drejtësisë të gjithë përgjegjësit.