Policia e Fierit njoftoi sot (14 Tetor) arrestimin e Leonard Dhamos, 26 vjeç, si shoferin e dyshuar për aksidentin dramatik që ndodhi mbrëmjen e djeshme në aksin rrugor Levan-Qarr. Aksidenti rezultoi me katër persona të plagosur, përfshirë dy pasagjerë, dhe shkaktoi vdekjen e 37 deleve.
Sipas njoftimit zyrtar, Dhamo u arrestua pasi rezultoi se ishte në gjendje të dehur në momentin e aksidentit. “Në vijim të informacionit paraprak të dhënë mbrëmjen e djeshme, specialistët e Sektorit të Policisë Rrugore Fier arrestuan shtetasin L. Dh. (Leonard Dhamo) 26 vjeç, banues në fshatin Pishporo, sepse nga kryerja e testit të alkoolit, pas aksidentit, rezultoi se e drejtonte automjetin në gjendje të dehur,” thuhet në deklaratën e policisë.
Dhamo vetë mbeti i plagosur, së bashku me tre pasagjerë të tjerë. Aksidenti përfshiu gjithashtu dy mjete të tjera, si pasojë e goditjes që shkaktoi fillimisht 26-vjeçari në rrugë. Dyshohet se Dhamo ishte duke drejtuar automjetin me shpejtësi të lartë.
Dosja për këtë ngjarje është dorëzuar në prokurorinë lokale, ku Dhamo përballet me akuza për shkelje të rregullave të qarkullimit rrugor dhe drejtim mjeti në gjendje të dehur.
