Volos, Greqi – Policia greke ka arrestuar sot 40-vjeçarin shqiptar Pandeli Nakoleci, i cili masakroi me thikë bashkëshorten e tij, 36-vjeçaren Marjola Nakoleci, ditën e djeshme në qytetin e Volosit.

Sipas Protothema, Nakoleci u ndalua mesditën e sotme, në qendër të qytetit, pas një operacioni të gjerë të forcave të rendit. Ai u arratis menjëherë pas krimit, duke lënë pas katër fëmijët e mitur të çiftit.

Ngjarja e rëndë ndodhi në rrugën “Konstanta”, në pallatin ku jetonin. Sipas hetimeve paraprake, sherri mes bashkëshortëve ka nisur në apartamentin e tyre dhe ka vijuar në hyrje të pallatit, ku Nakoleci e ka goditur gruan me thikë në qafë dhe shpinë.

Krimi ka ndodhur në sy të njërit prej katër fëmijëve, ndërsa të tjerët ndodheshin brenda në banesë. 16-vjeçarja ka dëshmuar para policisë:

“E pashë babin duke goditur mamin me thikë.”

Autopsia e viktimës pritet të kryhet më 25 gusht, nga Departamenti i Mjekësisë Ligjore në Selanik, ku trupi i saj është transferuar tashmë.

Mediat greke raportojnë se viktima ka humbur jetën nga gjakderdhja e madhe, ndërsa hetuesit po verifikojnë nëse plagët janë shkaktuar vetëm nga thika apo edhe nga përplasja në një dritare xhami.

Ndërkohë, mësohet se Pandeli Nakoleci ka pasur të shkuar kriminale, pasi ka qenë më parë i akuzuar për pjesëmarrje në një organizatë kriminale dhe shkelje të ligjeve për drogë. Në qershor të këtij viti, ai ishte transferuar me urdhër të prokurorit në një klinikë për ekzaminim psikiatrik, ku qëndroi për disa ditë nën trajtim.