Autoriteti Rrugor Shqiptar ka publikuar për herë të parë projektin e segmentit të ri alternativ, i cili do të ndërtohet pas shembjes dramatike të rrugës Librazhd-Pogradec. Sipas videos të publikuar nga ARRSH, segmenti i ri prej 1.3 km do të kalojë pranë hekurudhës, në shtratin e lumit Shkumbin, duke rikthyer qarkullimin dhe sigurinë për mjetet. Segmenti është projektuar me pjerrësi të përshtatshme dhe të qëndrueshme.

Tre masat kryesore të vendosura nga Këshilli Teknik i ARRSH më 23 shkurt janë:
1. Devijimi i rrjedhës së lumit për të mos rrezikuar hekurudhën;
2. Demontimi i urës së dëmtuar;
3. Lehtësimi i ngarkesës në trupin e rrugës së rrëshqitur deri në krijimin e një skarpate natyrale që lejon ndërhyrje me mjete shpimi.

ARRSH ka njoftuar se do të vazhdojnë studimet dhe investigimet gjeologjike për të vlerësuar gjendjen e nëntokës. Simulimet dhe pamjet ajrore të marra çdo ditë tregojnë se rrëshkitja nisi nga poshtë, duke dhënë të dhëna të qarta për planifikimin e rikonstruksionit. Segmenti i ri pritet të sigurojë kalim të sigurt dhe të qëndrueshëm për automjetet në këtë zonë.