Tiranë – Asambleja e Partisë Socialiste, ku pritet të prezantohet edhe kabineti i ri qeveritar pas fitores në zgjedhjet parlamentare të 11 majit, ka nisur punimet në orën 11:00 në Pallatin e Kongreseve.

Në fjalën e tij, kryetari i PS-së dhe kryeministri Edi Rama e nisi duke folur për situatën në Bashkinë e Tiranës, të cilën e konsideroi të papërballueshme.

Rama tha se qeveria nuk ndërhyn në drejtësinë, duke theksuar pavarësinë e saj dhe rolin e reformës në drejtësi:
“Do të na duhet që të adresojmë këtu edhe emergjencën në drejtimin e Tiranës për arsyen e ditur botërisht. Nuk mban më. Nuk kemi hyrë në asnjë rast në meritën e drejtësisë dhe nuk kemi bërë avokatin e kujtdo që ndalohet nga drejtësia. Nuk do të kemi asnjë pendesë për lirinë dhe pavarësinë që i kemi dhënë drejtësisë.”

Kryeministri theksoi se sistemi i drejtësisë është larguar nga ndikimi i ekzekutivit, duke i dhënë mundësinë që vetë të zgjidhë punët e veta. Ai shtoi se qeveria socialiste është krenare për drejtësinë e re:
“Kush flet për kapje apo kontroll nga ana jonë nuk e di se çfarë flet. Kjo e drejtësisë është prova më e egër e zjarrit të PS-së. Forca jonë i ka hapur shteg drejtësisë së pavarur.”

Rama nënvizoi gjithashtu se pavarësia e drejtësisë sjell sfida, por PS-ja do të qëndrojë e fortë dhe nuk do të lëkundet:
“Ne do t’i durojmë të gjitha dhimbjet e këtij procesi, madje edhe kur ato vijnë nga ata që thonë se kemi kapur drejtësinë. Kjo është hera e parë që drejtësia godet persona me pushtet politik.”

Fjala e kryeministrit nënvizon përkushtimin e PS-së ndaj reformës në drejtësi dhe rolin e saj në krijimin e një sistemi të pavarur dhe të besueshëm.