Lajmi se një person i dënuar në burgjet shqiptare është përfshirë në listat e partisë në pushtet në Greqi, “Demokracia e Re”, dhe po garon për eurodeputet ka marrë vëmendje në mediat ndërkombëtare, përfshirë edhe agjencinë “Associated Press”.

Fredi Beleri, i cili u zgjodh si kryebashkiak i Himarës në vitin e kaluar, u arrestua për akuzat e blerjes së votave dhe nuk u betua në postin e tij. Më pas, ai u dënua me dy vjet burg. Beleri ka mohuar akuzat dhe qeveria greke e ka konsideruar paraburgimin e tij si të padrejtë, duke bërë thirrje për bllokimin e përpjekjeve të Shqipërisë për të hyrë në Bashkimin Evropian.

Partia në pushtet në Greqi, “Demokracia e Re”, ka bërë njoftimin e papritur duke lejuar Belerin të kandidojë për eurodeputet në zgjedhjet që do të mbahen në 6-9 qershor në 27 vendet anëtare të BE-së. Grekët pritet të votojnë më 9 qershor.

Beleri shprehu qëndrimin e tij në Facebook, duke thënë se beteja që po zhvillon nuk është personale, por një betejë për sundimin e ligjit dhe demokracinë.