Një ngjarje tragjike është shënuar ditën e sotme në Athinë, ku viktimë e një atentati mbeti 45-vjeçari shqiptar Irakli Davella, ndërsa Edi Lolo u plagos rëndë. Ngjarja ka ndodhur pranë një lokali në kryqëzimin e rrugëve Aristotelous dhe Komotinit, dhe dyshohet se ka lidhje me larje hesapesh mes grupeve kriminale.

Sipas mediave greke, Davella, i cili ishte shtetas grek me origjinë shqiptare dhe pronar i një lokali në zonën e Peristerit, ka pasur lidhje të njohura me mafian greke, duke qenë mik i tre personazheve të njohur të botës së krimit, Manolis Karagiannis, Vasili Griva dhe Giorgo Litsa, të cilët gjithashtu janë ekzekutuar vitet e fundit në Greqi.

Autorët e sulmit kanë përdorur një makinë të vjedhur më herët gjatë ditës për të kryer atentatin. Ata ishin të maskuar dhe qëlluan drejt dy shqiptarëve. Irakli Davella mori një plumb në kokë, që rezultoi fatal, ndërsa Edi Lolo, i cili kishte ardhur pak ditë më parë nga Dubai, u plagos në kokë dhe bark.

Pamje nga vendi i ngjarjes, të publikuara nga mediat greke, tregojnë trupin e pajetë të Davellas të mbuluar me gjak, një tablo që ka tronditur banorët e zonës.

Grupi hetimor ndodhet në vendin e ngjarjes dhe po punon për identifikimin dhe kapjen e autorëve. Policia greke dyshon se vrasja është pjesë e një serie hakmarrjesh midis grupeve të lidhura me krimin e organizuar.