Kryebashkiakja e re e Ekuadorit, Brigitte Garcia, dhe një këshilltar, u gjetën të vrarë brenda një makine këtë të dielë. Trupat e kryebashkiakes 27-vjeçare të qytetit San Vicente dhe këshilltarit të saj, Jairo Loor, u gjetën në provincën Manabi të qëlluar me armë zjarri.

Garcia i përkiste Partisë së Revolucionit Qytetar të ish-Presidentit Rafael Correa.

Ky i fundit përmes një postimi në rrjetet sociale dhe Luisa Gonzalez, kandidatja për presidente e partisë në zgjedhjet e fundit, e quajtën vrasjen e zonjës Garcias si një atentat.

Sapo mora vesh se ata kishin vrarë kryebashkiaken tonë të San Vicente-s, Brigitte Garcia. Nuk kam fjalë, është shokuese, askush nuk është i sigurt në Ekuador ASKUSH, shkruante Gonzalez. Ekuadori është përfshirë nga një valë dhune, për cilën autoritetet fajësojnë trafikun e drogës.

Presidenti Daniel Noboa shpalli gjendjen e jashtëzakonshme në janar, mes shtimit të dhunës ndërsa individë të armatosur morën kontrollin e një stacioni televiziv ndërsa ishte në transmetim të drejtpërdrejt.