Një atentat me dy të plagosur i ndodhur rreth orës 19:30 në fshatin Grudë e Re ka tronditur Shkodrën. Të plagosurit janë Gjergj Ndershtiqaj, 28 vjeç, student në Akademinë e Sigurisë vëllai i drejtorit të DRSHTRR, dhe kunati i tij Gjon Nika, 30 vjeç.
Ndaj makinës së tyre janë zbrazur 30 plumba. Autorët mësohet se kanë djegur automjetin e tyre dhe të të plagosurve, ndërsa dyshohet se shënjestra ka qenë Gjon Nika.
Dy të plagosurit po marrin trajtim në spitalin rajonal, ndërsa në Shkodrën tashmë të blinduar kanë mbërritur Forcat RENEA, kryepolici Muhamet Rrumbullaku dhe Drejtori i Krimeve të Rënda, Neritan Nallbati.
Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë gjetur duke u djegur një makinë tip “Renault”, që dyshohet se është përdorur nga autorët.
Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorëve.
