Atlético Madrid ka vendosur të anulojë koncertin e premtuar gjatë pushimit të pjesës së parë të derbit të Madridit në stadiumin “Metropolitano”. Klubi kishte planifikuar të organizonte një shfaqje me artistët Abraham Mateo dhe Dana Paola. Megjithatë, gjithçka është anuluar për shkak të disa komenteve të këngëtares dhe aktores meksikane Dana Paola, të bëra gjatë një interviste për programin “La Revuelta”.
Gjatë intervistës me televizionin spanjoll “RTVE”, Dana Paola ka shprehur dashurinë e saj për Real Madridin dhe ka parashikuar fitoren e ekipit madrilen në derbin e ardhshëm. Këto deklarata nuk janë pritur mirë nga klubi i Atlético Madrid, i cili ka vendosur të anulojë shfaqjen, duke shmangur kështu një situatë të sikletshme për tifozët e tyre në një ndeshje aq të rëndësishme si derbi i Madridit.
