Policia italiane ka identifikuar dhe arrestuar autorin e dyshuar të vrasjes së 22-vjeçares shqiptare, Ilaria Sula. Ai është Marc Samson, 23 vjeç, me origjinë nga Filipinet, i cili ka pranuar krimin.

Sipas dëshmisë së tij, ai e ka goditur disa herë me thikë të renë, trupin e saj e ka futur në një valixhe dhe më pas e ka hedhur në një zonë pyjore në Poli, afër Romës.

Policia italiane kontrolloi banesën e tij, ku ai jetonte me prindërit – një çift filipinas që kishin vite që jetonin në Itali. Miqtë e familjes e përshkruajnë 23-vjeçarin si një djalë të qetë, ndërsa prindërit e tij janë njerëz të njohur në komunitet.

Një tjetër detaj tronditës është fakti se, pasi e vrau, Samson dyshohet se përdori celularin e Ilaria-s për të postuar story në rrjetet e saj sociale, duke u përpjekur të ngatërronte hetimet.

22-vjeçarja shqiptare humbi kontaktet me familjen dhe shoqet më 25 mars, ndërsa trupi i saj u gjet disa ditë më vonë i futur në një valixhe në një zonë të pyllëzuar.

Hetimet po vazhdojnë për të zbuluar motivet e krimit dhe detaje të tjera mbi këtë ngjarje tragjike.