Të gjithë avokatët e Shqipërisë janë përfshirë në një grevë katër ditore kundër miratimit të hartës së re gjyqësore, e cila sipas tyre zvogëlon ndjeshëm numrin e gjykatave në të gjithë vendin dhe cënon dhënien e drejtësisë për qytetarët.

Nga protesta e Lezhës, disa avokatë deklaruan se nëse nuk do të merren parasysh kërkesat e tyre dhe të ridimensionohet harta e re gjyqësore, atëherë ata do të përshkallëzojnë kërkesën e tyre dhe do të bojkotojnë masat e sigurisë në orët në vijim.

“Kemi shpallur bojkot për shkak të hartës së re gjyqësore pasi është marrë një vendim i njëanshëm dhe janë shpërfillur të gjitha ato që ne kemi kërkuar të pasqyroheshin. Duke shpërfillur në mënyrë totale interesin e qytetarëve dhe duke shpërfillur në mënyrë totale interesat e qytetarëve në gjykatë dhe pë rë të gjitha arsyet e tjera që ne i kemi shpalosur në të gjitha instancat.

Ne kemi sghpallur këtë bojkot si hapin e parë opër të kaluar më pas në hapa të tjerë. Shpresojmë që gjatë këtij bojkoti të reflektohet nga ana e qeverisë dhe KLGJ-së.  Në mënyrë që të pasqyrohen ndryshimet në hartën e re gjyqësore dhe të mos cënohen qytetarët në dhënien e drejtësisë.

Shpresojmë shumë që gjatë këtij bojkoti të reflektohen këto ndryshime. Ndryshe ne do të përshkallëzojmë protestën tonë duke bojkotuar në javët në vijim të gjitha masat e sigurimit”, tha një prej avokatëve pjesëmarrës në protestë.

Protesta janë zhvilluar dhe në qytetet të tjera si Vlorë, Sarandë dhe Gjirokastër.