Emisioni Inside Story ka zbuluar se azili privat “Ruaje Moshën”, megjithëse zyrtarisht i mbyllur, vijon aktivitetin në mënyrë të fshehtë.

Sipas Inspektoratit Shtetëror të Punës dhe Shërbimeve Shoqërore, ky institucion ka dorëzuar më 1 nëntor 2024 një kërkesë pranë Gjykatës së Shkallës së Parë për çregjistrim nga regjistri i organizatave jofitimprurëse, duke nënkuptuar mbylljen e tij ligjore.

Por pamjet e siguruara nga Inside Story tregojnë të moshuar brenda ambjentit të azilit, ndërsa stafi largohet me nxitim dhe mbyll dyert sapo sheh kamerat.

Kjo vjen pas skandalit të bërë publik nga Fiks Fare, ku qytetari Artan Muderizi denoncoi se babai i tij ndërroi jetë një muaj pas një aksidenti brenda azilit, pa asnjë shpjegim nga drejtuesit e institucionit.

Në vend të një reagimi të përgjegjshëm, një prej punonjësve të azilit iu përgjigj në mënyrë kërcënuese gazetarit:

“Kush e rruan k… për historitë që ke marrë vesh ti? Ik, mos u kruaj, o budalla, se do e hash keq.”

Pavarësisht mbylljes zyrtare, kjo situatë tregon se azili vijon të funksionojë në mënyrë të paligjshme, duke ngritur shqetësime serioze për trajtimin e të moshuarve dhe mungesën e transparencës nga institucionet përgjegjëse.