Mounir Nasraoui, babai i talentit të Barcelonës Lamine Yamal, është ende i shtruar në Spitalin Can Ruti në Badalona pas një sulmi të rëndë me thikë të ndodhur më 14 gusht në një parking në Mataró. Pas një ditë nën vëzhgim, ai u transferua në repart dhe gjendja e tij shëndetësore është në përmirësim, sipas raportimeve nga “El Mundo Deportivo”.

Në një deklaratë të siguruar nga emisioni sportiv spanjoll ‘El Chiringuito’, Mounir falënderoi Zotin për përmirësimin e tij dhe shprehu optimizëm për rikuperimin e plotë. “Faleminderit Zotit jam shumë më mirë. Duhet të jem më i qetë për të mirën e të gjithëve, timen dhe të familjes sime. Nuk kam zgjidhje tjetër. Duhet të mendojmë se drejtësia do të bëjë punën e saj dhe do të bëhet,” tha Nasraoui.

Mounir pranoi se përjetoi momente të vështira pas goditjes së trefishtë me thikë nga një grup personash që duket se i zunë pritë pas një konflikti të mëhershëm. Ai u sulmua ndërsa po shëtiste qenin e tij në rrugët e Badalonas. “E pashë veten mes jetës dhe vdekjes, sigurisht që kisha frikë. Si çdo qenie njerëzore,” rrëfeu ai.

Në përfundim të deklaratës së tij, Mounir Nasraoui shprehu mirënjohjen për mbështetjen që ka marrë dhe dërgoi një mesazh optimist për ekipin e Barcelonës. “Shpresoj që të dalë sa më shpejt,” tha ai, duke shtuar se “këtë vit ata do të jenë një ekip i madh dhe ne do të bëjmë gjëra të mëdha,” me një vëmendje të veçantë për djalin e tij, Lamine Yamal.