Ministri i Brendshëm, Taulant Balla, ka shprehur falënderim ndaj Forcave të Policisë së Shtetit dhe Gardës së Republikës për angazhimin dhe përkushtimin e tyre në mbarëvajtjen e suksesshëm të Samitit të Europës-Juglindore në Tiranë, ku mori pjesë Presidenti i Ukrainës, Volodymyr Zelenskyy.

Në një postim në rrjetet sociale, Balla ka përgëzuar qytetarët për respektimin e masave kufizuese të vendosura nga policia në lidhje me këtë ngjarje të rëndësishme rajonale.

“Tirana, kryeqyteti i Europës së Ballkanit, mikpriti dhe organizoi me sukses Samitin e Europës-Juglindore, ku mori pjesë Presidenti i Ukrainës Volodymyr Zelenskyy dhe udhëheqësit më të lartë të vendeve të rajonit. Përgëzime dhe mirënjohje të gjitha forcave të Policisë së Shtetit dhe Gardës së Republikës të angazhuara në këtë operacion të madh për garantimin e mbarëvajtjes së këtij Samiti të rëndësishëm. Shumë mirënjohje edhe banorëve të kryeqytetit për mirëkuptimin ndaj masave kufizuese”,- shprehet Balla.