Kreu i Grupit Parlamentar të Partisë Socialiste, Taulant Balla, e cilësoi si historike ftesën e bërë nga presidenti amerikan Donald Trump për përfshirjen e Shqipërisë në Bordin e Paqes, gjatë fjalës së tij në seancën plenare të Kuvendit.

Balla u shpreh se Kuvendi po thirret të marrë një vendim që shkon përtej rendit të zakonshëm të ditës, duke e konsideruar këtë ftesë si një vlerësim të drejtpërdrejtë për rolin e Shqipërisë në promovimin e paqes ndërkombëtare.

“Sot Kuvendi thirret të marrë një vendim me një kërkesë të veçantë politike dhe historike, ku Republika e Shqipërisë dhe kryeministri Rama janë ftuar të jenë anëtarë të Bordit të Paqes. Ky është një vlerësim i drejtpërdrejtë për rolin e Shqipërisë dhe shënon një moment pa precedent pozitiv, ku vendi ynë shihet si faktor që ndikon në paqe dhe jo më si një shtet periferik,” deklaroi Balla.

Ai theksoi se presidenti Trump e ka cilësuar këtë nismë si një përpjekje historike dhe madhore, që përfaqëson një qasje të re në ndërtimin e paqes në zonat e konfliktit, me fokus të veçantë në Gaza.

“Jo më vëzhgues, por të ftuar si bashkëthemelues,” nënvizoi Balla, duke shtuar se kjo ftesë dëshmon rritjen e rolit dhe peshës ndërkombëtare të Shqipërisë në çështjet e sigurisë dhe paqes globale.