Kosova e ka shprehur qëndrimin e saj se është kundër Ballkanit të Hapur, ndaj ajo nuk ka marrë pjesë në asnjë samit të zhvilluar mes Shqipërisë, Serbisë dhe Maqedonisë së Veriut.

Nga ana e tij, kryeministri Rama tha se nuk është problem që nuk bie dakord me Albin Kurtin për pjesëmarrjen e Kosovës në Ballkanin e Hapur.

“Jam shumë i lumtur për cdo investim të huaj që vjen në Shqipëri, por ne kemi nevojë për kampionët tanë, që janë ata që bëjnë sipërmarrje në Shqipëri, Kosovë e kudoqoftë dhe që përfaqësojnë ambicien e sipërmarrësve shqiparë. Unë takohem me bizneset e Kosovës në Kosovë apo Shqipëri, por kjo nuk ka të bëjë me marrëdhëniet me qeverinë e Kosovës dhe nuk duhet të përfshihet ëktu asnjë spekulim, sepse nuk është i vërtetë. Spekulime mund të bëni, se ju jetoni me to, por e vërteta është se ne jemi shumë pozitivë në raport me Kosovën, me marrëdhëniet, dhe nuk ka asnjë diskutim se për çështjet që kanë të bëjnë me Kosovën dhe për Kosovën, ne nuk jemi dy. 

“E vërtetë që Ballkani i Hapur nuk na bashkon, por ama nuk na ndan. Në këtë pikë kemi këndvështrime të ndryshme ky nuk është sekret, por këto këndvështrime të ndryshme nuk na pengojnë që në marrëdhëniet bilaterale të ecim përpara.
Porosia ime për qeverinë që drejtoj është që çdo gjë që ne jetësojmë në Ballkanin e Hapur duhet ta jetësojmë dhe me Kosovën.

Do ishte çudi sikur unë me Albinin do duhet të binim dakord për çdo gjë, fakti që nuk biem dakord për çdo gjë tregon që jemi në rregull. Kur vjen puna për Ballkanin e Hapur dhe Procesin e Berlinit janë çështje të natyrës konceptuale”, tha Rama.