Torino, Itali – Autoritetet italiane kanë përfunduar hetimet ndaj një bande të dyshuar për kryerjen e dhjetëra vjedhjeve në zonën e kodrave të Torinos. Sipas njoftimit të Karabinierëve, tetë persona janë vënë nën hetim për bashkëpunim kriminal, shumica prej tyre me origjinë shqiptare dhe disa aktualisht të burgosur në Torino për vepra të tjera penale.

Hetimet, të zhvilluara midis janarit 2024 dhe marsit 2025, kanë dokumentuar 68 episode vjedhjesh të kryera me thyerje, ndërsa po shqyrtohen edhe raste të tjera të dyshuara. Banda kishte një strukturë të qartë hierarkike dhe vepronte me profesionalizëm, duke përdorur makina të regjistruara në emra të palëve të treta për të shmangur identifikimin, si dhe bashkëpunëtorë që ruanin mallrat e vjedhura në vende të sigurta.

Zyrtarët e policisë italiane theksojnë se ky grup kriminal operonte me efikasitet dhe koordinim të lartë. Gjatë një prej grabitjeve të fundit, një pjesë e anëtarëve të bandës u kapën në flagrancë dhe u arrestuan nga Karabinierët e kompanisë Chieri, çka çoi më pas në zbardhjen e të gjithë rrjetit kriminal.

Autoritetet italiane vijojnë hetimet për të identifikuar të gjithë personat e përfshirë dhe për të gjetur sendet e tjera të vjedhura që ende nuk janë rikuperuar.