Një gjykatë britanike ka dënuar me një total prej 40 vjetësh burg pesë shtetas shqiptarë dhe rumunë, pjesë e një strukture kriminale që shfrytëzoi seksualisht dhe përdhunoi të mitura në qytetin Gateshead, në Angli.

Sipas “Daily Mail”, grupi vepronte mes marsit 2019 dhe majit 2021, duke abuzuar me gjashtë vajza të moshës së mitur. Përveç përdhunimeve të përsëritura, të pandehurit akuzoheshin edhe për trafik droge dhe sulm seksual.

Si vepronte banda

Hetimet zbuluan se autorët u afroheshin vajzave të mitura duke u ofruar cigare, alkool dhe drogë, dhe më pas i detyronin të kryenin akte seksuale me persona të ndryshëm. Abuzimet ndodhnin në vende të ndryshme të qytetit—përfshirë një bordello të improvizuar, apartamente dhe madje edhe një park publik.

Dëshmitë tronditëse të viktimave

Një nga vajzat, e cila përjetoi përdhunim të përsëritur, deklaroi në gjykatë:

“Mendova se do të vdisja… Kam frikë nga të gjithë burrat. Nuk u hap derën as shpërndarësve, nuk dua të shërbehem nga burra në dyqan. Më duket se kjo traumë nuk do të mbarojë kurrë.”

Një tjetër viktimë, e sulmuar në park, tha:

“Më shkatërruan kujtimet e fëmijërisë. Trauma nuk do të zhduket kurrë.”

Një vajzë e tretë tregoi se jeton ende nën ankth të përhershëm:

“Nuk munda të jetoja një jetë normale adoleshente. Ndihem e sigurt vetëm në shtëpi.”

Të pandehurit mohuan gjithçka

Gjatë procesit gjyqësor, të pesë të dënuarit mohojnë çdo akuzë, ndërsa një i gjashti u shpall i pafajshëm. Gjykata i cilësoi krimet “të tmerrshme, të planifikuara dhe me pasoja shkatërruese”.

Vendimi konsiderohet një prej dënimeve më të rënda të dhëna kohët e fundit në Angli për abuzime seksuale ndaj të miturve.

Në qendër të debatit publik qëndron tani nevoja për masa më të forta mbrojtëse për fëmijët e pambrojtur, të cilët shpesh bien pre e rrjeteve kriminale të organizuara.