Barcelona ka zbuluar zyrtarisht fanellën e re për sezonin 2025-26, duke rikthyer një dizajn klasik me vija vertikale kuqekaltër, që ka ngjallur menjëherë entuziazëm mes tifozëve. Në ditën e parë të shitjes, radha të gjata u formuan në dyqanet zyrtare të klubit, ku Lamine Yamal ka qenë pa diskutim emri më i kërkuar.

Fanella me numrin 10 në shpinë është më e shitura, edhe pse klubi ende nuk ka zyrtarizuar bartësin e këtij numri historik. Megjithatë, për tifozët duket se nuk ka dyshim: Lamine Yamal do ta trashëgojë atë.

“Lamine është trashëgimtari i Messit dhe e meriton numrin 10,” tha një tifoz katalanas entuziast, duke reflektuar ndjesinë e përgjithshme në rradhët e mbështetësve.

Një tjetër tifoz, që siguroi fanellën menjëherë pas lançimit, u shpreh:

“Gjatë gjithë javës ai ka dërguar sinjale. Nuk doja ta humbisja mundësinë për ta pasur ndër të parët.”

Sipas mediave spanjolle, kjo është fanella më e shitur në ditën e parë të prezantimit në historinë e klubit.

Dizajni i ri: kthim te tradita me prekje moderne

Fanella e re është vlerësuar gjithashtu për rikthimin te rrënjët tradicionale, duke përfshirë vija të pastra vertikale me nuanca të thella të kaltër dhe të kuqe, ndërsa materiali përmban efekte të lehta të përziera që japin një pamje moderne dhe dinamike.

“Ngjyrat, kthimi te tradita, efektet… është një çmenduri e bukur,” shkroi një tjetër tifoz në rrjetet sociale.

Barcelona tashmë duket se po ndërton një imazh të ri për një epokë të re – dhe në qendër të kësaj është një adoleshent që po merr ngadalë statusin e një ikone: Lamine Yamal.