Kryetari i Grupit Parlamentar të Partisë Demokratike, Gazment Bardhi, ka ngritur zërin në Kuvend lidhur me çështjen e mikrokredive, duke theksuar rastin tragjik të Pal Trashajt. Trashaj u bë viktimë e skandalit të mikrokredive, dhe Bardhi fajëson Guvernatorinë e Bankës së Shqipërisë për këtë situatë.

“Dua të ndalem tek rasti i Pal Trashajt. Nuk mund të heshtim kur ka me mijëra qytetarë që po vuajnë abuzimet nga kompani të miratuara nga Banka e Shqipërisë. Përgjegjësinë kryesore e ka Banka e Shqipërisë dhe me emër e mbiemër guvernatori i bankës. Ka përshtatur rregullat e bankës së Shqipërisë sipas interesave të kompanisë. Guvernatori i Bankës së Shqipërisë ka përgjegjësi ligjore,” deklaroi Bardhi.

Bardhi theksoi se çështja e Pal Trashajt nuk është një rast i vetëm dhe se shumë qytetarë janë viktima të abuzimeve nga kompanitë e mikrokredive. Ai theksoi se Banka e Shqipërisë dhe guvernatori i saj kanë përgjegjësi për këtë situatë.

“Po ne e dimë që t’i marrësh shtëpinë dhe pasurinë një familje shqiptare, është njësoj si t’i marrësh jetën. Ata kanë punuar për të pasur një shtëpi dhe e gjen veten nga 700 mijë lekë kredi në 7 milionë lekë. Kjo nuk është çështje që duhet të na ndajë. Ne kemi pjekurinë për t’i shërbyer këtyre qytetarëve duke evidentuar përgjegjësitë e guvernatorit dhe arsyet që e kanë çuar atë të mos veprojë në kohë,” theksoi Bardhi.

Më 2 korrik, historiani i njohur Pal Trashaj piu fostoksinë para SPAK, pasi pretendonte se përmbarimi i kishte bllokuar pronat, pavarësisht se e kishte shlyer kredinë që kishte marrë. Ai u përcoll për në banesën e fundit sot.

Bardhi bëri thirrje për një hetim të plotë dhe për përgjegjësinë e guvernatorit dhe lidhjet e tij me kompanitë e mikrokredive. “Guvernatori i Bankës do të duhet që të japë llogari në Kuvend. Duhet të hetojmë nëse interesat e kompanive të lidhura me Guvernatorin e Shqipërisë e kanë nxitur atë të mos ndërmarrë veprime,” përfundoi Bardhi.