Kreu i grupit parlamentar të Partisë Demokratike, Gazment Bardhi, ka reaguar ashpër ndaj veprimit të Presidentit Bajram Begaj, i cili ka kërkuar nga Gjykata Kushtetuese caktimin e datave për përfundimin e mandateve të gjyqtarëve. Bardhi e cilëson këtë si një përpjekje për kapjen e plotë të Gjykatës Kushtetuese nga Kryeministri Edi Rama.

“Ky është një akt i pashembullt për të kapur 100% Gjykatën Kushtetuese. Kushtetuta garanton një mandat të plotë 9-vjeçar për gjyqtarët në detyrë dhe çdo cenim i tij minon pavarësinë e gjykatës dhe shtetin e së drejtës,” – deklaroi Bardhi.

Sipas tij, ky veprim është pjesë e një skenari politik të mazhorancës, i cili vë në rrezik legjitimitetin e Gjykatës Kushtetuese dhe pavarësinë e sistemit të drejtësisë.

Bardhi e quajti Begajn një “ushtar të bindur të Ramës”, duke akuzuar se akti i tij përbën një sulm direkt ndaj Kushtetutës.

“Kjo lojë duhet të ndalet menjëherë. Rruga ku po ecën Presidenti është një tentativë për të shkatërruar pavarësinë e Gjykatës Kushtetuese dhe të drejtësisë në Shqipëri,” – përfundoi ai.

Mbetet për t’u parë nëse do të ketë një reagim nga Presidenca ose Gjykata Kushtetuese për këtë çështje që po shkakton përplasje të forta politike.