Shkodër – Autoritetet policore kanë shpallur në kërkim Bajram Bregun, 39 vjeç, i njohur si Barush Bregu, dhe një 17-vjeçar, të dy të dyshuar si bashkëpunëtorë në atentatin që ndodhi një ditë më parë në Shkodër, ku humbën jetën dy persona dhe u plagosën dy të tjerë.

Bregu konsiderohet si një nga njerëzit më të afërt të Ibrahim Licit dhe është një figurë e njohur për policinë. Ai ka precedentë të shumtë penalë: në vitin 2016 u dënua me 4 vite burg për kultivim bimësh narkotike dhe armëmbajtje pa leje, ndërsa në vitin 2018 gjatë një operacioni policor u gjet në banesën e tij një kallashnikov, dhe më pas shpëtoi nga ndjekja policore duke përplasur dy patrulla me makinën e tij. Pas disa muajsh në kërkim, u arrestua në vitin 2019 në Tiranë, në një banesë me qira në zonën e “Komunës së Parisit”.

Policia dyshon se Barush Bregu ka marrë pjesë në shumë ngjarje kriminale të rëndësishme së bashku me Ibrahim Licin, përfshirë edhe vrasjen e dyfishtë të vëllezërve Bilali. Hetimet e lidhin atë si krahun e djathtë të Licit, duke ndihmuar në çdo lëvizje dhe veprim të tij në Shkodër.

Autoritetet kanë apeluar tek qytetarët që të raportojnë çdo informacion për vendndodhjen e tij, ndërsa hetimet për të zbardhur të gjitha rrethanat e atentatit vijojnë intensivisht.