Teksa sot pritet të hidhet në votim në seancën plenare drafti i Amnistisë Penale, mazhoranca duket se nuk i ka ende 84 votat për t’u miratuar nga ligjvënësit. Për këtë arsye dhe debatet për këtë çështje ka reaguar dje kryetari i Partisë Demokratike, Lulzim Basha, i cili deklaroi në një konferencë për media votën kundër amnistisë nga deputetët e tij, ndërsa akuzoi mazhorancën se po tenton të shpëtojë zyrtarët e korruptuar.

Manja i përgjigjet Bashës

Ndërkohë, përgjigjen Bashës ia dha pas mbledhjes së qeverisë vetë ministri i Drejtësisë, Ulsi Manja, ndërsa e la të hapur rrugën për konsensus. Në një prononcim për media, ai tha se pret reflektim. “Dua të jem i qartë që në fillim, ka amnisti nga dënimi dhe jo amnisti nga ndjekja penale. Kemi ndjekur traditën e ndjekur më herët. Një nga propozimet ka qenë që në kategorinë e të dënuarve që nuk përfitojnë nga amnistia por ulje dënimit të jenë edhe ata të dënuar nga Gjykata e Posaçme. Kjo nuk do të thotë që ne jemi refraktar. Pres reflektim”, tha Manja. Manja, i cili e argumentoi pranimin e amendamentit me barazinë e qytetarëve para ligjit, ftoi të gjithë deputetët për votë pro.

PD reagon pas deklaratës së ministrit të Drejtëisë

Nga ana tjetër, sekretari për Çështjet Ligjore në Partinë Demokratike, Indrit Sefa, i është përgjigjur ministrit të Drejtësisë, Ulsi Manja në lidhje me amendimin e draftit të Amnistisë Penale nga i cili parashikohet që të përfitojnë dhe të dënuarit me vendim të formës së prerë nga GJKKO. Sefa theksoi se Manja dola pa u skuqur dhe si burracak për të justifikuar vendimin që synon të amnistojë të korruptuarit e tyre. Ai shtoi se, PD nuk do bëhet kurrë pjesë e këtij pazari të ndyrë dhe kërkon tërheqjen e këtyre ndryshimeve.

Çfarë ka ndodhur?

Kujtojmë se, amendamenti i miratuar pak ditë më parë në komision që mori edhe dakordësinë e qeverisë parashikon që edhe personat e dënuar nga GJKKO mund të përfitojnë ulje dënimi nga 1 deri në 1.5 vite burg, duke shfuqizuar germën c të nenit 5, pika 2, që i përjashtonte nga kriteret e përfitimit të amnistisë. Fillimisht u përmend si autor i amendamentit, deputeti i Rithemelimit, Bledion Nallbati, por ky e mohoi dhe tha se është propozuar nga socialisti Plarent Ndreca, ndërkohë që pak më vonë edhe Rithemelimi njoftoi se as ata nuk do ta votojnë Amnistinë Penale në Kuvend. Amnistia Penale u paraqit në Kuvend në fillim të dhjetorit të kaluar, ndërsa mungesa 84 votave e ka shtyrë më shumë se 2 muaj.