Bruksel – Kaja Kallas, Përfaqësuesja e Lartë e Bashkimit Evropian për Politikë të Jashtme dhe Siguri, ka vendosur që diplomati nga Danimarka, Peter Sorensen, të emërohet Përfaqësues i Posaçëm për Dialogun midis Kosovës dhe Serbisë, duke zëvendësuar Mirosllav Lajçak.

Burime diplomatike nga Bashkimi Evropian kanë konfirmuar se emri i Sorensen është dërguar për miratim te vendet anëtare të BE-së dhe pritet të konfirmohet në takimin e Komitetit Politik dhe të Sigurisë (PSC). Kjo procedurë konsiderohet formale, pasi Kallas ka vendosur tashmë për emërimin e tij.

Sorensen, aktualisht Këshilltar i Lartë për Diplomacinë Digjitale në Shërbimin e Veprimit të Jashtëm të BE-së (EEAS), ka një përvojë të gjerë diplomatike në Ballkanin Perëndimor. Ai ka shërbyer si Përfaqësues i Posaçëm i BE-së për Bosnje dhe Hercegovinën, si dhe ka pasur pozita të rëndësishme në misionet e BE-së në Shkup dhe Sarajevë. Puna e tij në Kosovë dhe në Serbi e ka bërë atë një kandidat të fortë për këtë post.

Mandati i aktualit dërguar, Mirosllav Lajçak, skadon më 31 janar, dhe Sorensen pritet të nisë detyrën e tij në shkurt. Ai do të përqendrohet ekskluzivisht në dialogun Kosovë-Serbi, ndryshe nga paraardhësi i tij që ka pasur detyra më të gjera në Ballkanin Perëndimor.

Dialogu ndërmjet Kosovës dhe Serbisë, që ka nisur më 2011 dhe ndërmjetësohet nga BE-ja, ka prodhuar disa marrëveshje, por shumë prej tyre mbeten të pa zbatuara, duke krijuar tensione në procesin e normalizimit të raporteve mes dy vendeve.