Bashkimi Evropian ka njoftuar sanksione të reja ndaj Rusisë, në përpjekje për ta bërë Putin që të reflektojë, dhe të heqë dorë nga agresioni ndaj Ukrainës.

Lajmi është bërë i ditur nga Presidentja e Komisionit Evropian Ursula von der Leyen, e cila foli për një moment vendimtar për Evropën. Sanksionet do të synojnë fusha duke përfshirë sektorin financiar, energjinë, transportin dhe vizat për elitën ruse, tha ajo pas një takimi që përfundoi në orët e para të së premtes në Bruksel.

Von der Leyen tha se masat e miratuara do ta bënin të pamundur për Rusinë blerjen e teknologjisë për të përmirësuar rafineritë e saj të naftës ose pjesë këmbimi për avionët.

“Paketa e sanksioneve masive të miratuara sot, tregon se sa e bashkuar është BE-ja”, shkroi ajo në Twitter. Presidenti francez Emmanuel Macron tha se 300 milionë euro (336 milionë dollarë; 251 milionë £) ndihmë do t’i ofrohen Ukrainës, si dhe pajisje ushtarake.

Sanksionet nuk mbulojnë importin e gazit rus në BE. E pyetur për këtë, Von der Leyen tha se ata po shikonin urgjentisht se si të largonin Evropën nga varësia e saj nga energjia ruse.

Sanksionet përfshijnë: ngritjen e disa transaksioneve bankare, bllokimin e shitjeve të paisjeve për rafinerinë e naftës, ndalimi i udhëtimeve pa vizë edhe për personat që mbajnë pasaportë diplomatike, ndalimi i shitjes së pjesëve për avionë në Rusi.

“Tani synojmë 70% të tregut bankar rus, por edhe kompanitë kryesore shtetërore, duke përfshirë fushën e mbrojtjes, dhe këto sanksione do të rrisin kostot e huamarrjes së Rusisë, do të rrisin inflacionin dhe gradualisht do të gërryejnë bazën industriale të Rusisë,” tha presidentja e KE, duke zbuluar më tej se BE-ja “po synonte gjithashtu elitën ruse duke frenuar depozitat e tyre në mënyrë që të mos i fshehin më paratë e tyre në strehë të sigurta në Evropë”.

Bashkimi Evropian do të punojë gjithashtu për ta bërë “të pamundur për Rusinë që të përmirësojë rafineritë e saj të naftës” dhe “të ndalojë shitjen e të gjitha pjesëve rezervë dhe pajisjeve të avionëve për linjat ajrore ruse” në një përpjekje për të “degraduar sektorin kyç të ekonomisë ruse dhe lidhjen e vendit”, zbuloi Von der Leyen, duke vënë në dukje se “tre të katërtat e flotës tregtare aktuale të Rusisë u ndërtuan në Bashkimin Evropian, SHBA dhe Kanada”.

Së fundi, BE-ja do të kufizojë aksesin e Rusisë në “teknologjinë thelbësore” dhe “teknologjitë e rëndësishme që i nevojiten për të ndërtuar një të ardhme të begatë” dhe do t’u heqë diplomatëve dhe biznesmenëve rusë “qasjen e tyre të privilegjuar në Bashkimin Evropian”.

Të enjten, Von der Leyen dënoi “sulmin barbar” të Rusisë ndaj Ukrainës dhe “argumentet cinike për ta justifikuar atë”, dhe akuzoi presidentin rus Vladimir Putin për “kthimin e luftës në Evropë”.

“Objektivi i Rusisë nuk është vetëm Donbasi, objektivi nuk është vetëm Ukraina, objektivi është stabiliteti në Evropë dhe i gjithë rendi ndërkombëtar i paqes” , pohoi ajo.