Këngëtarja e njohur me origjinë shqiptare, Bebe Rexha, ka reaguar ashpër në rrjetet sociale pas publikimit të disa fotografive të saj në një gjendje të rënduar shëndetësore. Këto imazhe, të realizuara jashtë një spitali, u shpërndanë gjerësisht nga mediat, me Daily Mail si një nga të parat që e publikoi lajmin.

Reagimi i fortë i Bebe Rexhës

Në një sërë postimesh në Instagram, artistja shprehu zemërimin dhe zhgënjimin për mënyrën se si paparacët e kanë ndjekur dhe e kanë fotografuar në një moment të vështirë. Ajo sqaroi se ishte e shtruar për tre ditë për shkak të një gripi të rëndë në stomak dhe kritikoi ashpër sjelljen e mediave.

“E di që ka një imazh të caktuar timin që po merr shumë vëmendje për pamjen time. Kam qenë në spital për tre ditët e fundit me një grip të rëndë në stomak dhe ajo isha unë duke hyrë në spital.
Kush pret jashtë një spitali për të bërë fotografi të njerëzve që hyjnë?! Kur do të ndalojnë paparacët së shfrytëzuari gratë në momentet e tyre më të këqija! Jam e tërbuar. As nuk mund të jesh e sëmurë në paqe!”

Përballja me Daily Mail dhe gazetaren Sonia Horon

Bebe Rexha shënjestroi direkt Daily Mail dhe gazetaren Sonia Horon, duke e quajtur artikullin e tyre manipulues dhe duke akuzuar median për mungesë etike.

”@dailymail Ju jeni vërtet të neveritshëm. Ju e dinit që ato fotografi të miat u bënë jashtë spitalit. Kush bën fotografi të njerëzve të sëmurë duke hyrë në spital dhe më pas e fokuson artikullin tek pamja e tyre?! Pse nuk thatë që ajo po hynte në spital?! Sepse e dini që është gabim. @soniahoron, sidomos duke qenë një grua, duhet të ndihesh e turpëruar për veten.”

Reagimi i saj ka marrë mbështetje të madhe nga fansat dhe figura të njohura, të cilët dënojnë këtë shkelje të privatësisë dhe trajtimin e grave në media.