Në prag të përballjes historike Shqipëri–Serbi, futbollisti Bekim Balaj ndau emocionet dhe përjetimet nga ndeshja e paharrueshme në Beograd, duke theksuar rëndësinë e madhe të sfidës së ardhshme në Tiranë.

“Është një ndeshje që mbetet përjetë në memorien tonë. Në atë përballje, edhe pse ishim më pak në numër, djemtë dhanë maksimumin dhe treguan se nuk na mungonte asgjë për të mbrojtur simbolet tona,” tha Balaj. Ai shtoi se situata aktuale është ndryshe, por kjo sfidë ka rëndësi të madhe, pasi Serbia është rivalja kryesore për kualifikimin në Botëror.

Sulmuesi i njohur apeloi për qetësi dhe përqendrim nga shokët e skuadrës: “Ngarkesa emocionale është e madhe, por duhet të ruajmë gjakftohtësinë dhe të mos lejojmë që atmosfera e stadiumit të na largojë nga objektivi kryesor — fitore që do të kishte një vlerë të jashtëzakonshme.”

Në një takim motivues me të rinjtë në Shkodër, në kuadër të edicionit “Ta tham n’Shkodër”, Balaj përcolli një mesazh frymëzues për brezin e ri: “Mesazhi im gjithmonë është që ata të ndjekin ëndrrat e tyre pa vendosur limite. Ëndrrat bëhen më të mëdha kur nuk ndalemi para sfidave.”

Ky takim tregon se rruga drejt suksesit mund të nisë nga qytete si Shkodra dhe nga ëndrrat e thjeshta të të rinjve shqiptarë, të cilët kanë nevojë për shembuj frymëzues si ai i Bekim Balajt.