Policia belge ka arrestuar një shtetas shqiptar, i dyshuar për përfshirje në një ngjarje të ndodhur rreth një muaj më parë në zonën Place Bizet, Anderlecht, ku si pasojë e të shtënave me armë zjarri mbeti i plagosur një person.

Ngjarja ka ndodhur gjatë natës së 21-22 marsit, kur një burrë u qëllua dhe u plagos rëndë. Fatmirësisht, falë ndihmës së parë të ofruar nga pronari i një restoranti burgeri ku viktima u strehua, jeta e tij u shpëtua dhe ai tashmë ndodhet jashtë rrezikut për jetën.

Sipas burimeve të afërta me hetimin, autori i dyshuar është arrestuar dhe është proceduar nga një magjistrat hetues, i cili ka vendosur ta vendosë nën mbikëqyrje elektronike, një masë që nënkupton se i dyshuari nuk mbahet në burg, por lëvizjet e tij monitorohen rreptësisht përmes pajisjeve të posaçme.

I dyshuari mohon çdo përfshirje në këtë krim, duke refuzuar akuzat për përdorim të armës apo plagosjen e viktimës. Ndërkohë, hetimet janë ende në vijim për të zbardhur motivet dhe rrethanat e ngjarjes.

Ajo që e bën këtë çështje edhe më shqetësuese është se i dyshuari rezulton të jetë i dënuar më parë me 21 vjet burg për vrasjen e një tjetër shtetasi shqiptar në vitin 2013. Ky fakt ka shtuar interesimin e organeve hetimore për të verifikuar nëse ngjarja e fundit lidhet me konflikte të vjetra apo motive personale.

Sipas autoriteteve, ngjarja nuk lidhet me trafikun e drogës, ndryshe nga shumë raste të fundit të dhunës në Belgjikë që kanë pasur këtë sfond. Deri tani nuk ka prova që sugjerojnë një përfshirje të grupeve kriminale apo bandave të organizuara.

Policia belge vijon punën për të sqaruar rolin e të dyshuarit në këtë plagosje të rëndë dhe për të siguruar drejtësi për viktimën.