Drejtuesi politik i Partisë Demokratike për Tiranën, Belind Këlliçi, ka njoftuar përmes një postimi në Facebook se të premten, më 17 janar, do të mbahet një tjetër protestë para Bashkisë së Tiranës.

Këlliçi thekson se protesta ka si qëllim të tregojë para gjithë shqiptarëve se “kreu i 5D” dhe “pronari faktik i inceneratorit të Tiranës” nuk mund të amnistohet. Ai akuzon SPAK-un se po përpiqet ta trajtojë kryebashkiakun Erion Veliaj si një “xhepist të rëndomtë urbani”, ndërsa sipas tij, ai do mbahet mend si “hajduti më banal dhe i paskrupullt i këtyre 34 viteve demokraci”.

“Protesta jonë nuk do ndalet! Nesër, e premte, datë 17 janar, le të ngremë zërin sërish për të 42-tën herë dhe t’u tregojmë mbarë shqiptarëve se kreu i 5D dhe pronari faktik i inceneratorit të Tiranës nuk mund të amnistohet!”, shkruan Këlliçi.

Ai e cilëson çështjen e inceneratorëve si një skemë korruptive ku janë vjedhur 200 milionë euro dhe deklaron se këto para nuk do të falen kurrë.

“200 milionë eurot e vjedhura me inceneratorin Tiranë dhe bandën 5D, NUK do t’i falim kurrë! Bashkë do ia dalim,” përfundon Këlliçi, duke ftuar qytetarët të marrin pjesë në protestë.

Protesta e opozitës për çështjen e inceneratorëve vijon prej muajsh, duke e bërë këtë një nga temat më të nxehta politike në vend.