Gjatë një replikë të tensionuar në Kuvend, kryetari i Partisë Demokratike, Sali Berisha, akuzoi kryeministrin Edi Rama se po shmang paraqitjen për interpelanca dhe se po fsheh “dosjen” e tij nga publiku dhe deputetët.

Berisha theksoi se vetë ai është gjithmonë i gatshëm t’u përgjigjet çdo interpelance, duke i bërë një krahasim të drejtpërdrejtë kryeministrit dhe bashkëpunëtorëve të tij:

“Ku e keni Ramën? Ku e keni? Pas Lubisë, ku e keni? Nuk guxon të dalë para shqiptarëve nga ky parlament. Ai dhe Lubia nuk guxojnë të dalin.”

Kryedemokrati akuzoi mazhorancën se po funksionon vetëm në mënyrë formale dhe se frika e kryeministrit përballë interpelancave ka “kufi vetëm qiellin”:

“Ju keni rënë, kot votoni, kot sillni ligje e buxhete… Po zhvillohet një betejë, do ua deshifroj më vonë. Nuk ka gjë në botë që të mbyllë dosjen e tij, prandaj nuk guxon të vijë t’u përgjigjet interpelancave.”

Fjalimi i Berishës vjen në një atmosferë të tensionuar politike, ku opozita e akuzon kryeministrin për shmangie të përgjegjësive të tij parlamentare dhe për përpjekje për të fshehur informacionet e rëndësishme për publikun.

Ky reagim përforcon narrativën e PD-së për një mazhorancë që vepron jashtë kontrollit demokratik dhe transparencës, duke shtuar tensionin mes palëve në seancat parlamentare të javëve të fundit.