Kryetari i Partisë Demokratike, Sali Berisha, i bëri thirrje anëtarëve të partisë që të kalojnë nga “forca e qëndresës” në një “forcë politike të fitores”. Gjatë mbledhjes së Këshillit Kombëtar të PD-së, Berisha theksoi se koha është e përshtatshme për të forcuar pozitat dhe për të synuar fitore në zgjedhjet e ardhshme, duke përmendur se tani ndërkombëtarët e dinë që “Rama nuk bën zgjedhje”.

Ai i drejtoi fjalën anëtarëve të Këshillit Kombëtar, duke vlerësuar angazhimin e tyre të palëkundur gjatë periudhës të vështira dhe duke nënvizuar rëndësinë e ruajtjes së vlerave themelore të konservatorizmit. “Ne e bëmë këtë detyrë në kushtet më të papërshkrueshme, duke mbrojtur vlerat e familjes, dinjitetin njerëzor dhe interesin kombëtar,” theksoi Berisha, i cili shtoi se për të arritur sukses, PD duhet të kalojë nga një rol mbrojtës në një rol fitues në politikën shqiptare.

Të nderuar anëtare dhe anëtarë të Këshillit Kombëtar, Të nderuar drejtues të PD në këtë panel, të dashur demokrate e demokratë, mbështetës të PD kudo që jeni. Kjo mbledhje e Këshillit Kombëtar mblidhet në një moment kthese të madhe, të drejtuesve, anëtarëve, mbështetësve të PD të cilët u dëshmuan në këto kohëra të vështira, mbrojtës të palëkundur të atyre vlerave dhe parimeve që njerëzit e lirë mbrojnë në të gjithë botën, dhe ne e bëmë këtë detyrë.
Ne e bëmë këtë detyrë në kushtet më të papërshkrueshme, sepse të mbrosh, qëndrosh për vlerat themelore të konservatorëve, të qëndrosh për familjen, vlerat e saj, dinjitetin njerëzor, interesin kombëtar, kryen një mision, kryen një detyrë. Kur qëndron dhe në vetmi të madhe, e kryen dy herë më shumë këtë detyrë. Ndaj dhe sot ne mblidhemi në një moment kthese, në një moment kur ne duhet të kalojmë, nga forcë të qëndresës, në forcë politike të fitores.”