Jashtë selisë së PD, ku u rikthye një ditë pas protestës, ish-kryeministri Sali Berisha pranoi se mbështetësit e tij thyen xhamat dhe shqyen dyert e godinës, por sipas tij, këto veprime erdhën si kundërpërgjigje ndaj mbështetësve të Bashës.

Berisha nuk pranoi që mbështetësit e tij të kenë ushtruar dhunë dje në protestë, ndërsa shtoi se nëse ata do të kishin hyrë në seli, nuk do t’i kishin prekur demokratët që ndodheshin brenda.

“Ne jemi revolucion paqësor! E pe si u qëlluan protestuesit me karrige dhe tavolina! Sigurisht që ka reagim, nëse ti merr tavolia dhe t’ia hedhësh tjetrit kokës, normal që do këtë reagim. Ju patë vrasës që reagonin si bisha të tërbuara protestuesit”, tha Berisha.

Ai është justifikuar me faktin se pala e Lulzim Bashës provokoi turmën me hedhjen e gazit. “Kush e hodhi gazin?! Ata hodhën gaz, gazi i parë u hodh nga Lulzim Basha! Kjo sigurisht që revoltoi. Ai hodhi gaz dhe erdhi në katin e parë, s’mund të shtrohet kjo pyetje, protestuesit. Ka njeri të gërvishtur nga pala kundërshtare? Asnjë, kjo është protesta!”, tha ai

Për Berishën lëvizja nuk ka kthim pas apo të negociohet me Lulzim Bashën. Ish-kryeministri u shpreh se lëvizja është unike.

“Nuk përcakton Sali Berisha këtë, kjo është lëvizje që vjen nga vota e demokratëve. Ju realizoni një gjë, kjo është unike në historinë e Shqipërisë, janë demokratët që kanë votuar për çdo etapë. Janë votat që do përcaktojnë gjithçka”, tha ai.