Kryedemokrati Sali Berisha zhvilloi një takim elektoral në Pukë, ku nisi fjalën me një minutë heshtje në nderim të Papa Françeskut.

Në prezantimin e kandidatëve të Partisë Demokratike për zgjedhjet e 11 majit, Berisha e cilësoi këtë datë si një ditë historike për shqiptarët, një provë e vërtetë e dashurisë ndaj atdheut dhe një mundësi për t’i dhënë fund, sipas tij, diktaturës së drogës, krimit dhe vjedhjes.

“11 Maji është ora dhe prova e çdo shqiptari. Një kthesë vendimtare për të ndërtuar të ardhmen në Shqipëri dhe për të lënë pas një regjim që ka zbrazur vendin më shumë se çdo diktaturë tjetër në histori,” deklaroi ai.

Berisha u ndal edhe tek braktisja e zonave si Puka, të cilat i quajti “vende me pasuri përrallore që janë lënë në harresë”. Ai shprehu besimin e tij në fitoren e opozitës më 11 maj, duke e cilësuar atë si një “fitore të shpresës dhe të dinjitetit”.