Kreu i Partisë Demokratike, Sali Berisha, ka reaguar pas protestës së zhvilluar mbrëmjen e djeshme përpara Kryeministrisë, duke e cilësuar atë si një moment themelor në betejën politike të opozitës. Përmes një postimi në rrjetet sociale, Berisha deklaroi se gjatë protestës u “themelua Parlamenti i qytetarëve të lirë”, një simbolikë që sipas tij vjen pas pengimit të opozitës për të ushtruar normalisht aktivitetin parlamentar.

Berisha akuzon mazhorancën se ka “bllokuar parlamentarizmin” për deputetët opozitarë në seancat plenare, ndërsa e konsideron tubimin e mbrëmshëm si një formë alternative të përfaqësimit të shprehjes së lirë qytetare.

Ai paralajmëroi se protesta të tilla do të mbahen shpesh dhe në mënyrë periodike, derisa – sipas tij – kryeministri Edi Rama të largohet nga detyra, sidomos në lidhje me akuzat që lidhen me aferën e tunelit të Llogarasë.

“Nderim misionarëve të foltores parlamentare–qytetare të parë që themeluan sonte parlamentin e qytetarëve të lirë përballë narko-parlamentit të Ramaduros!”, shkroi Berisha, duke theksuar se beteja opozitare do të intensifikohet.