Ish-kryeministri Sali Berisha mesditën e sotme ishte për ngushëllim te familja Avdija e cila dy ditë më parë humbi vajzën 7-vjeçare pasi një komisar i policisë e përplasi me skaf në breg të detit në Potam të Himarës.
Në një deklaratë për mediat, Berisha tha se si qytetar i thjeshtë i shprehu ngushëllime familjes Avdija, por theksoi se autori i krimit “monstruoz” ishte njeriu i qeverisë.
“Unë erdha për të shprehur ngushëllime më të ndiera familjes Avdija, erdha si qytetar. Për familjen e Jonadës e cila humbi jetën në një krim horror. Kjo ka trondit thellë çdo shqiptar, kjo ngjarje është një krim i shëmtuar. Duhet të ishe vetëm një individ si ai që e kreu se kurrë nuk mund të ndodhte një akt i tillë. Një akt i tillë është jashtë përfytyrimit për një qytetar të thjeshtë por në fakt ky akt u krye nga një njeri i qeverisë. Ky akt u krye me një mjet monstruoz krimi siç ishte skafi me 600 kuaj fuqi motor. Ky akt u krye me distancën 3-4 metra larg bregut. Në prani të qindra pushuesve dhe fëmijëve që lozin aty pranë. Në këtë aspekt komisari s’është asgjë tjetër vetëm një xhelat dhe krimi është një dëshmi e një shteti mbushur me lëndime. Ju i keni vetë rastet nuk mund t’i numërojmë këtu me radhë vdekjet në stacionet e policisë, varsje brenda stacioneve të policisë”, u shpreh Sali Berisha.