Tiranë, 14 qershor 2025 – Kreu i Partisë Demokratike, Sali Berisha, ka publikuar të premten disa pamje filmike që, sipas tij, provojnë manipulime flagrante gjatë procesit zgjedhor të 11 majit. Në një deklaratë për mediat, Berisha tha se videot janë marrë nga kamerat e sigurisë të instaluara në qendrat e votimit dhe faktojnë “alegjitimitetin e plotë të procesit zgjedhor”.

“Kam zgjedhur sot vetëm 6 video nga mbi 60 mijë pamje të analizuara,” u shpreh Berisha, duke theksuar se këto pamje janë “fytyra e vërtetë e zgjedhjeve të 11 majit” dhe pasqyrojnë “një farsë zgjedhore të dirigjuar nga kryeministri Edi Rama dhe mbrojtur nga Altin Troplini dhe banda e tij”.

Në videot e prezantuara, Berisha përshkroi skena ku komisionerët, sipas tij, kontrollonin votat e qytetarëve në mënyrë të paligjshme, manipulonin fletët e votimit, apo sillnin vota nga jashtë pa identifikim. “Ky komisioner fut dorën në kuti, nxjerr votën, e kontrollon dhe sigurohet nëse votuesi ka respektuar porosinë për të cilën është paguar,” deklaroi ai.

Berisha theksoi gjithashtu se disa persona kanë votuar me dy e deri në katër fletë votimi, duke i quajtur “votues profesionistë” të paguar për të falsifikuar rezultatin. “Ky është kontroll më i ulët dhe më i poshtër mbi votën e qytetarëve se çdo diktaturë,” tha ai, duke shtuar se “të gjitha këto veprime kriminale mbrohen nga Altin Troplini dhe struktura të përfshira në krim elektoral”.

Në përfundim të fjalës së tij, kreu i opozitës ftoi qytetarët dhe mediat të ndjekin me vëmendje videot për të kuptuar thellësinë e asaj që ai e quajti “krim zgjedhor i pashembullt në historinë e Shqipërisë”.