TIRANË – Në një fjalim të zjarrtë nga foltorja e Kuvendit, ish-kryeministri Sali Berisha ka lëshuar akuza të rënda ndaj strukturave të drejtësisë dhe mazhorancës qeverisëse, duke marrë si shembull rastin e deputetit opozitar Qani Xhafa, i cili, sipas Berishës, është ndaluar pa të drejtë nga policia nën pretekstin e shkeljeve në qarkullimin rrugor.

“Në këtë vend, drejtësia nuk ndjek më kriminelët, por opozitarët,” u shpreh Berisha me tone të ashpra. “Deputeti Qani Xhafa, një njeri i nderuar, është ndaluar me pretendimin se ka qenë me shpejtësi dhe ka konsumuar alkool. Ky është krimi i tij, sipas këtyre! E dini kush e ndjek çështjen? Altin Troplini! Kreu i SPAK-ut! Si mund të merret drejtuesi i një strukture antikorrupsion me një çështje të thjeshtë civile?”

Berisha akuzoi direkt Altin Dumanin – të cilin e ironizoi si “Troplini” – për “certifikimin e krimeve elektorale dhe të amnistisë antikushtetuese”, ndërsa deklaroi se përdorimi politik i drejtësisë është në kulm. Ai u drejtua edhe kolegëve të mazhorancës me tone të forta:
“Ju nuk keni më zë! E drejtoni këtë Kuvend si të ishte një zyrë sekretareshh. Si ka mundësi që askush nga ju nuk ngrihet për të thënë të vërtetën? Ju e keni nga frika apo nga krimet që ju rëndojnë mbi shpinë?”

Fjalimi i Berishës u ndërpre disa herë nga zhurma në sallë, por ai vijoi duke theksuar se “Republika është kthyer në një teatër kukullash ku drejtësia është instrument i partisë në pushtet”.

Ndërkohë, nga ana e saj, mazhoranca dhe përfaqësues të institucioneve të drejtësisë nuk kanë reaguar ende publikisht ndaj deklaratave të Berishës.

Rasti i deputetit Qani Xhafa pritet të ndezë më tej debatet në skenën politike, teksa tensionet mes opozitës dhe institucioneve të reja të drejtësisë sa vijnë e shtohen.