Nga foltorja e selisë blu, kryedemokrati Sali Berisha komentoi ashpër zhvillimet e ditës së djeshme në Kuvend, duke e cilësuar si një kapitullim pa kushte të pseudomazhorancës së krimit dhe të Altin Troplinit, të cilin e quajti “mercenar i Edi Ramës”.

Berisha theksoi se mazhoranca u përpoq të shkelte ligjet dhe Kushtetutën, duke ndjekur udhëzimet e kreut të SPAK-ut, Altin Dumani, i cili sipas tij refuzoi të merrte pyetje direkte nga deputetët.

“Është një akt i pashembullt! Në të gjitha parlamentet e botës, pyetjet bëhen me shkrim dhe me gojë. Dorëzohen me shkrim që zyrtari të mund të përgatisë përgjigjet, lexohen nga autori i pyetjeve dhe ky është një standard,” – tha Berisha.

Ai kujtoi se kompromisi i arritur lejonte që zyrtari të lexonte pyetjet dhe pas përgjigjeve, autori të shprehej për dy minuta mbi përgjigjet e dhëna. Berisha e cilësoi këtë si një fitore të opozitës dhe një moment ku përpjekja për të vërtetat triumfoi.

Kryedemokrati kritikoi gjithashtu mënyrën sesi Troplini reagoi ndaj pyetjeve: “Ai nuk duronte dot pyetjet direkte, i dukeshin si shigjeta. Ata që shkelmuan Kushtetutën e lanë në rënie të lirë, sepse kishin frikë nga opozita që do ua nxirrnim dosjet në parlament.”

Berisha e mbylli fjalimin duke theksuar se skenat e ditës së djeshme ishin të papërsëritshme, duke ilustruar, sipas tij, një kompromis mes krimit dhe pushtetit.