Dasma e ish-kryeministrit Silvio Berlusconi, me deputeten 32-vjeçare, Marta Fascina, gjatë këtyre ditëve ka qenë kryefjala e mediave rozë, ku ditën e djeshme, ata kurorëzuan në mënyrë simbolike dashurinë e tyre në martesë.

Berlusconi dhe 32-vjeçarja, u martuan vetëm në mënyrë simbolike, pasi martesa e tyre nuk do të ketë asnjë vlerë ligjore. 85-vjeçari me partneren e tij, ka festuar ditën e shtunë në prani të miqve të tyre dhe familjarëve, në Vilën Gernetto në Lesmo, Brianza.

Sipas mediave italiane, Berlusconi kishte veshur një kostum Armani në ngjyrë blu, ndërsa Marta Fascina një fustan të bardhë dantelle franceze, bust.

Të pranishëm kanë qenë të afërm dhe miq të Berlusconit, si dhe gjithë të afërmit e Marta Fascinës. Në fund të ceremonisë, të ftuarit u zhvendosën në ambientet e brendshme të Villa Gernetto, për një aperitiv dhe drekë, të shoqëruar nga tre violina.