Një grua është lënduar pasi është goditur nga materialet e rënda që kanë rënë nga kulmi i ndërtesës së Komunës së Prishtinës, në lagjen Arbëria, të enjten. Pas ndihmës së parë nga ekipi i Qendrës së Mjekësisë Urgjente (QMU), ajo është dërguar me shenja jete në Klinikën Emergjente të Qendrës Klinike Universitare të Kosovës (QKUK).

Drejtori i QMU-së, Avdyl Pacolli, ka konfirmuar incidentin dhe ka dhënë detaje rreth trajtimit të gruas. “Pacientja është trajtuar në vendin e ngjarjes. Më pas, me autoambulancë, duke i dhënë serum, pacientja është përcjellë me shenja vitale të jetës deri në Klinikën Emergjente. Ajo është pranuar në emergjencë dhe në këtë institucion ka filluar me marrë trajtimin,” tha Pacolli.

Megjithatë, ende nuk ka informacion mbi gjendjen aktuale të pacientes nga Klinika Emergjente në QKUK.

Incidentin e ka konfirmuar edhe Policia e Kosovës. Ata kanë nisur hetimet për zbardhjen e plotë të rrethanave që karakterizojnë ngjarjen. Policia ka bërë të ditur se ngjarja ndodhi në rrugën “Nora e Hotit” në Prishtinë, dhe personi i lënduar, një grua, është dërguar në QKUK për trajtimin e nevojshëm mjekësor.

“Rreth orës 13:00, është raportuar se në rrugën ‘Nora e Hotit’, në Prishtinë, një person ka marrë lëndime si pasojë e goditjes nga materiale që janë shkëputur nga çatia e një objekti. Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër, e cila është dërguar në QKUK për trajtimin e nevojshëm mjekësor”, tha policia në një përgjigje për REL-in.

Policia ka bërë të ditur se tashmë ka nisur punën për zbardhjen e plotë të të gjitha rrethanave që karakterizojnë ngjarjen.