Ka shkuar në 143 numri i të vrarëve në sulmin e ndodhur pasditen e djeshme (22 mars 2024) në një sallë koncertesh në periferi të Moskës. Lajmi bëhet i ditur nga agjencia e lajmeve ruse Ria Novosti.

Mes viktimave të sulmit me armë të ndodhur në sallën Crocus City në Krasnogorsk, janë dhe 3 fëmijë. Më shumë se 145 janë të plagosurit.

Katër persona, të prangosur si të përfshirë direkt në atentatin në Moskë janë mes 11 të arrestuarve, informoi shefi i sigurisë ruse presidentin Vladimir Putin. Mes të arrestuarve janë dhe 4 autorët e sulmit, dy me pasaporta nga Taxhikistani, bëjnë të ditur mediat ruse.

Agjencia ruse e sigurisë informon se sulmuesit të cilët u arrestuan në rajonin e Bryansk mëngjesin e sotëm “kishin synim të kalonin në Ukrainë” dhe kishin “kontakte me palën ukrainase”, citon Ria Novosti. m

SHBA beson se pas sulmit është Shtetit Islamik por Rusia ende nuk ka komentuar. Kievi ka mohuar të jetë pas këtij atentati. Nga ana tjetër dje ish-presidenti rus, Dmitry Medvedev paralajmëroi Ukrainën se nëse kishte gisht në sulm, do të merrte përgjigjie “shkatërrimtare”.

Javë më parë, SHBA paralajmëroi Rusinë se mund të ishte shënjestër e sulmeve terroriste.

Videot e shpërndara në rrjetet sociale treguan persona të armatosur teksa hyjnë në sallë hapin zjarr, përpara fillimit të një koncerti nga grupi muzikor rus, Piknik.

Në pamje, shihet momenti kur 6200 të pranishëm që po ndiqnin koncertin, të tmerruar tentojnë të largohen për të shpëtuar jetën.