Të tjera detaje zbulohen nga mediat italiane lidhur me historinë e Davide Pecorelli-t, biznesmenit që konsiderohej i zhdukur për 8 muaj me radhë, ku inskenoi vdekjen e tij.

Historia e zhdukjes së biznesmenit italian, Davide Pecorelli, ngjan me një roman triller. Një ditë më parë ai dëshmoi se për disa muaj kishte qëndruar në një komunitet murgjërish, në Medjugorie, në Bosnjë Hercegovinë.

Duke folur përpara organit të akuzës Pecorelli tha se kishte shkelur disa ligje në Shqipëri dhe falë ndihmës së një prifti të njohur katolik në vendin tonë shkoi në Medjugore.

Sipërmarrësi italian pranoi përpara prokurorëve se në tetor kishte planifikuar të kthehej në shtëpi. Gjithashtu, ai bëri një pohim të rëndësishëm, kur tha se kishte kryer krime në Shqipëri. “Unë nuk kisha asgjë për të fshehur. Kam kryer gjithsesi krime, për të cilat do të flasë prokurori. Pjesa e parë e historisë është tragjike, por nuk do të jem unë ai që do ta rrëfejë këtë gjë”, deklaroi 45-vjeçari.

Davide Pecorelli mbërriti në Shqipëri më 3 janar të 2021. Fillimisht shkoi në Vlorë, më pas në Shkodër e në Pukë, ku qëndroi për dy netë. Gjurmët e tij u zhdukën në mesnatën e 6 janarit, ndërsa makina ku ai udhëtonte u gjet e djegur e brenda saj mbetje kockore, që kurrë nuk u vërtetuan që ishin të tijat. Për 8 muaj ai humbi kontaktet, por do të zbulohej pas një incidenti me varkë në ishullin e Montecristos, ku rrezikoi mbytjen.

“Vendosa të zhdukem sepse kisha probleme ekonomike. Jam praktikisht i rrënuar”, pranoi biznesmeni në dëshminë 3-orëshe para prokurorëve. 45-vjeçari tha se në tetor kishte planifikuar të kthehej në shtëpi, ndonëse ai u zbulua këtë muaj pas një ngjarjeje aksidentale.

“Nuk kisha asgjë për të fshehur. Për ligjet që kam shkelur (në Shqipëri) u tregova gjithçka prokurorëve kur më morën në pyetje. Ju mediave, ju kërkoj të bëni detyrën sepse kam katër fëmijë, ndër ta tre minoren dhe një të rritur. Silluni në mënyrë profesionale dhe mos abuzoni nga situata”, është shprehur ai.

Dyshimet se biznesmeni italian kishte inskenuar “vrasjen” e tij ishin ngritur edhe më herët nga Policia shqiptare, ndërsa po verifikohen edhe dyshimet për dhunim të varreve. Dyshimet lindën sapo zjarrfikësja shoi flakët dhe në makinë u gjetën mbetjet kockore.

Sipas ekspertëve kriminalistë, por edhe zjarrfikësve, ishte e pamundur që trupi i një njeriu të digjej aq shpejt për një kohë aq të shkurtër. Për më tepër, që aty të mbeteshin vetëm kockat.